Durante o mes de xaneiro, a delegación galega de ACPP desenvolveu diversas actividades vinculadas ao proxecto “Escolas Sen Racismo, Escolas para a Paz e o Desenvolvemento (ESR-EpD)”: a posta en marcha do obradoiro “Que me dá paz?”. e a conmemoración do Día Escolar da Non Violencia e da Paz o 30 de xaneiro.
O obradoiro “Que me dá paz?” é o primeiro dunha secuencia de catro obradoiros en total nos que profesorado e alumnado reflexionan sobre o que significa a paz, así como se perciben as súas aulas e escolas como ambientes “pacíficos”. As sesións realizáronse co alumnado de 1º e 2º de educación secundaria obrigatoria xunto profesorado titor nos seguintes centros: IES Chano Piñeiro de Forcarei, IES Plurilingüe Antón Losada da Estrada, IES de Brión e IES Xulián Magariños de Negreira.
Este obradoiro deu resultados interesantes porque, en xeral, o alumnado e o profesorado participantes relacionan a paz con conceptos como a tranquilidade e a calma, aínda que tamén está presente a paz concibida como a ausencia de conflito ou guerra, vinculándoa co respecto e a igualdade. A maioría identifica ás súas familias e amigos como elementos necesarios para a súa paz.
Este obradoiro foi realizado por Raquel, técnica de proxectos en Galicia, xunto con Cecilia e Lucía, alumnas que realizan as súas prácticas no 4º curso do Grao de Educación Social da Universidade de Santiago de Compostela. Ademais, en todos os centros educativos colaboraron os departamentos de orientación.
Por outra banda, dende o inicio deste curso, os centros de ESR participantes en Galicia coñeceron, a través da intranet web do proxecto, a historia de Sadako Sasaki e as mil grullas de papel. A Sadako Sasaki diagnosticáronlle leucemia aos doce anos como consecuencia da bomba atómica que caeu sobre Hiroshima cando tiña dous anos. Mentres estaba no hospital, un amigo díxolle que unha lenda tradicional xaponesa di que se fas mil grullas de papel, os teus desexos faranse realidade. Sadako morreu en 1955 cando fabricara 644 grúas de papel. As súas amizades completaron as mil grúas co desexo de evitar guerras e acadar a paz en todo o mundo. Con esta inspiradora historia, retamos aos colexios a facer mil grúas de papel e aproveitar a oportunidade para coñecer a organización Nihon Hidankyo, gañadora do Premio Nobel da Paz 2024.
Así, o 30 de xaneiro, coincidindo coa conmemoración do Día Escolar da Non Violencia e a Paz, os centros do ESR realizaron diversas accións: no IES Antón Losada da Estrada encheron a entrada do instituto de grúas de papel elaboradas polo alumnado e leron un texto sobre Sadako Sasaki; No IES Chano Piñeiro de Forcarei colgáronse nos corredores do colexio grúas de papel elaboradas polo alumnado; No IES de Brión colgáronse as grúas do teito da biblioteca e o coro do centro amenizou o acto e, finalmente, o IES Xulián Magariños de Negreira encheu de grúas de papel a entrada do centro e tamén lembrou os “Álbumes de guerra” de Castelao xa que este ano 2025 dedícaselle xa que é o 75 aniversario da morte do referente galego.
O ESR-EpD é unha aposta integral polo fortalecemento da transversalidade da educación para o desenvolvemento e a cidadanía global en Galicia cunha clara orientación á educación para unha cultura de paz. Seguiremos apoiando metodoloxías e enfoques que fomenten a reflexión e a mobilización, e que fagan dos centros educativos escolas de paz.